ការលូតលាស់របស់ទារក ០ ទៅ​ ១ខែ (មាន video)

ដំបូងខ្ញុំសូមអបអរសារទប៉ាម៉ាក់ និងស្វាគមន៍កូនជាទីស្រឡាញ់មកកាន់ផ្ទះរបស់យើង។

សម្រាប់ប៉ាម៉ាក់ដៃថ្មី ដែលទើបសម្រាលកូនដំបូងប្រាកដជាមានអារម្មណ៍ថា រំភើបផង អរផង និងបារម្មណ៍ផងដោយមិនដឹងថាគួរចាប់ផ្ដើមពីណាទៅណា។ ចេញពីបទពិសោធន៍ផ្ទាល់ខ្លួន ខ្ញុំសូមជម្រាបថាប៉ាម៉ាក់កុំបារម្មណ៍អី ព្រោះចាប់ពីពេលនេះទៅកូនជាទីស្រឡាញ់របស់ម៉ាក់គេកំពុងតែក្លាចជាក្មេងរឹងម៉ាំនិងលូតលាស់យ៉ាងល្អពីមួយថ្ងៃទៅមួយថ្ងៃ។ តែដើម្បីជម្រុញឲ្យគេលូតលាស់បានល្អ ម៉ាក់គួរដឹងថាក្នុងដំណាក់កាលនេះគេត្រូវការ និងមានការលូតលាស់យ៉ាងណាខ្លះ។

ការលូតលាស់របស់ទារកពី០ទៅ១ខែ៖

រឿងមួយដែលគេចេះមុនគេនោះគឺបៅនិងគេង។ ក្នុងដំណាក់កាលនេះ ទារកបៅញឹក គេងញឹក។ គេបៅរៀងរាល់ ២ទៅ៣ម៉ោងម្ដង និងគេងសរុបប្រហែល២០ម៉ោងក្នុង១ថ្ងៃ។ ជាទូទៅគេបៅគេង ក្រោកពីគេងបៅ ហើយគេក៏ជុះញឹកញាប់ផងដែរ។

ទោះបីជាគេនៅតូចបែបនេះក៏ដោយ ក៏គេចាប់ផ្ដើមសម្គាល់និងចាប់អារម្មណ៍ជាមួយយើងហើយ គេអាចញញឹមតាមយើងពេលគេឃើញយើងញញឹម។ 

ការវិវត្ដគំឃើញ

ទារកអាចមើលឃើញច្បាស់ក្នុងគម្លាត ២០ទៅ២៥សម. ចឹងបានជាគេតែងតែសំលឹងមុខម្ដាយពេលដែលយើងដាក់ឲ្យគេបៅ ឬពេលខ្លះគេងាកតាមមុខម៉ាក់ផងដែរ។

ការវិវត្ដការស្ដាប់

ចាប់ពីគេកើតមក ត្រជៀករបស់គេអាចស្ដាប់សំលេងបានយ៉ាងច្បាស់។ គ្រាន់តែគេមិនទាន់អាចគាល់បានថានោះជាសម្លេងអ្វី មកពីកន្លែងណា។ តែសម្រាប់សម្លេងម៉ាក់ គេពេលខ្លះគេអាចសម្គាល់បានច្បាស់ជាងគេ ដោយសារគេតែងតែលឺសម្លេងរបស់និយាយពេលគេនៅក្នុងផ្ទៃ។ ចាប់ពីពេលនេះទៅ វាគឺជាដំណាក់កាលចាប់ផ្ដើមដ៏សំខាន់មួយដែលយើងគួរនិយាយជាមួយគេ ឬអានសៀវភៅឲ្យគេស្ដាប់ឲ្យបានច្រើន ដើម្បីបង្រៀនគេពីការស្ដាប់ ការបកប្រែសំលេង និងការសម្គាល់សម្លេងជាដើម។ បើយើងនិយាយជាមួយគេញឹកញាប់ វាក៏ជួយជម្រុញឲ្យគេមានការលូតលាស់ក្នុងការនិយាយនិងទំនាក់ទំនងបានឆាប់រហ័សផងដែរ។

ការវិវត្ដសកម្មភាព ឬកាយវិការ

គេមានសេរីភាពក្នុងការធ្វើចលនាយ៉ាងខ្លាំង ដោយយើងអាចសង្កេតឃើញថាភាគច្រើនគេលើកដៃ លើកជើង ធាក់ចុះធាក់ឡើង ដោយនៅមិនស្ងៀមទេ សូម្បីតែពេលគេងហើយក៏ដោយ ក៏ពេលខ្លះដៃជើងរបស់គេក៏នៅតែលើកចុះឡើងៗ មើលទៅដូចភ្ញាក់ៗ។ តែនេះជាសកម្មភាពធម្មតារបស់ទារក។​ ការធ្វើបែបនេះ ប្រៀបដូចគេកំពុងតែហាត់បា្រណ ដែលវាអាចជួយជម្រុញការលូតលាស់របស់សាច់ដុំរបស់គេ។

ចំណែកឯក្បាលរបស់គេភាគច្រើនគឺងាកទៅម្ខាងៗ គេមិនទាន់ចេះប្រែងាកទៅឆ្វែង ឬទៅស្ដាំដោយខ្លួន​ឯងឡើយ។ រីឯម្រាមដៃរបស់គេវិញគឺតែងតែក្ដាប់ជានិច្ច។